Синоќа, во топла празнична атмосфера, во Домот на културата „Марко Цепенков“ – Прилеп се одржа традиционалниот новогодишен концерт на Основното музичко училиште „Ордан Михајлоски – Оцка“, настан кој уште еднаш го потврди талентот, посветеноста и љубовта кон музиката што ја негуваат младите музичари од Прилеп.
Концертот беше вистинско огледало на континуираната и посветена работа на учениците, на бројните часови исполнети со вежбање, трпение и упорност, како и на стручноста и визијата на професорите и раководството на училиштето. Публиката имаше можност да ужива во богата и разновидна музичка програма, во изведба на учениците од различни одделенија и инструменти, кои преку своите настапи го претставија својот континуиран труд, посветеност и музички напредок. Програмата опфати дела од класичната музика, како и композиции со празничен и новогодишен карактер, внимателно избрани од страна на наставниот кадар. Новогодишниот концерт претставуваше и можност за афирмација на младите музички таленти, кои преку сценски настапи го стекнуваат своето изведувачко искуство и ја градат својата уметничка самодоверба.
Основното музичко училиште „Ордан Михајлоски – Оцка“ со право важи за расадник на таленти и една од културните гордости на Прилеп.
