Во Ректоратот на Универзитетот „Св. Климент Охридски“ – Битола, отворена е изложба „Од уметничката ризница на Ректоратот на УКЛО“, која на едно место обединува внимателно селектирани дела од богатиот фонд на универзитетската колекција, создадена и надградувана речиси пет децении.
Поставката, реализирана во соработка со галеријата „Ранко Струмениковски“ – Битола, нуди визуелно патување низ историјата на институцијата, нејзините академски врски и културни соработки со универзитети и институции од Балканот и Европа. Делата, донирани во различни периоди, сведочат за еден жив и динамичен процес на размена кој го надминува формалниот протокол и прераснува во трајно културно и пријателско наследство.
Ректорот проф. д-р Игор Неделковски истакна дека колекцијата претставува жива архива на Универзитетот, паметник за неговиот развој од основањето на 25 април 1979 година до денес. Според него, овие уметнички дела не се само естетски објекти, туку и симболи на континуитет, пријателство и интелектуална еволуција. – Изложените дела не се само артефакти, тие се сведоци на растот на нашиот Универзитет. Тие го бележат патот на УКЛО од неговите почетоци до денешниот статус на респектабилен европски центар за високо образование. Универзитетот е многу повеќе од збир на амфитеатри, лаборатории и научни трудови. Тој е жив организам кој дише преку знаењето, но се храни со уметноста. Токму затоа, Универзитетот „Св.Климент Охридски“ – Битола во соработка со галеријата „Ранко Струмениковски“ од Битола, со особена чест презентира дел од својата уметничка колекција – визуелно патување, низ времето и пријателствата, градени со децении. Често пати мислиме дека науката и уметноста се наоѓаат на спротивни страни – едната строга и аналитична, другата слободна и емотивна. Сепак, во срцето на секој голем научен пробив и секое уметничко дело, лежи истата искра – креативноста и стремежот да се разбере светот околу нас. Дарувањето уметничко дело не е само протоколарен гест. Тоа е чин на длабока почит и трајна врска. Овие слики носат парче од идентитетот на дарителите, кое останува во домот на примателот како залог за идна соработка. Посебен акцент во изложбата е ставен и на првото лого и ректорската инсигнија на Универзитетот – дело на академскиот сликар Ранко Струмениковски, кои денес добиваат ново читање како дел од визуелниот идентитет и историјата на институцијата.
Галеристот д-р Драган Ристевски нагласи дека изложбата произлегла од идеја поттикната од минатогодишна уметничка средба, при што постепено се оформил концептот за систематизирање и презентација на оваа вредна колекција. Во реализацијата учествуваат и историчарот на уметност Владо Ѓорески, како и фотографот Сашо Ристевски, кои придонесо за нејзината современа визуелна презентација.
Изложбата, покрај историската и уметничката димензија, отвора и пошироко прашање за односот меѓу научниот и естетскиот свет. Таа потсетува дека вистинскиот интелектуален развој не може да се одвои од визуелната и емоционалната култура, туку напротив – се надополнува со неа.
Во таа насока, уметничката поставка на УКЛО суптилно се вклопува во пошироки современи културни движења и визуелни практики на Алијансата КОЛОРС, каде бојата, формата и идејата се користат како јазик за интерпретација на идентитетот и просторот – без притоа да ја нарушат автономијата на секој поединечен уметнички контекст.
Со оваа поставка, УКЛО уште еднаш ја отвора својата институционална внатрешност кон јавноста, претставувајќи го Ректоратот не само како административен, туку и како културен и симболички простор, во кој уметноста и науката коегзистираат во ист ритам на развој и инспирација.
