Во центарот на Прилеп вчера се одржа Регионалниот натпревар по прва помош (Регион 1), во организација на Црвениот крст на РСМ и Општинската организација на Црвен крст – Прилеп. Настанот собра средношколски екипи од повеќе градови, кои преку практични симулации ги демонстрираа своите знаења, вештини и подготвеност за навремено реагирање во итни ситуации.
Овогодинешната тема на натпреварот беше „Прва помош во урбана средина“, а на повеќе пунктови низ градот натпреварувачите решаваа сценарија со повредени лица и симулирани несреќи, оценувани од стручни судии и поддржани од бројни волонтери.
Настанот уште еднаш ја потврди важноста на едукацијата на младите во областа на првата помош, но и значењето на хуманоста, солидарноста и чувството на одговорност кон заедницата. Особено внимание привлече посветеноста на учениците, кои покажаа висок степен на подготвеност, тимска работа и смиреност при изведувањето на задачите.
Регионалниот натпревар во Прилеп е дел од националните активности на Црвениот крст на РСМ за унапредување на знаењата и практичните вештини кај младите, со цел подигање на свеста за важноста од правилно и навремено укажување прва помош.
На настанот присуствуваше Генералниот секретар на Црвениот крст на РСМ, д-р Саит Саити, кој ги поздрави присутните и ги додели наградите на најуспешните екипи. Присутни беа и градоначалникот на Општина Прилеп, Дејан Проданоски, како и претседателката на Советот на Општина Прилеп, Билјана Кржеска, кои ги посетија пунктовите и разговараа со учесниците, волонтерите и организаторите.
Најдобар пласман на регионалниот натпревар освои екипата на ООЦК Центар, второто место ѝ припадна на ООЦК Кичево, а третото на ООЦК Виница. Меѓу најуспешните беа и екипите на ООЦК Прилеп и ООЦК Гази Баба. Првите пет пласирани екипи обезбедија учество на државниот натпревар по прва помош.
Натпреварот помина во духот на пријателство, поддршка и заедништво, а Прилеп уште еднаш беше домаќин на настан кој, покрај натпреварувачкиот карактер, испрати и силна порака за важноста на знаењето, човечноста и подготвеноста да се помогне кога е најпотребно.
