Љубителите на класичната музика во Прилеп синоќа имаа можност да уживаат во концертот на камерното трио „Trio Dolce“, кое пред публиката во Фоајето/Ликовниот салон на НУЦК „Марко Цепенков“ понуди внимателно одбрана и разновидна музичка програма.
Светлана Богданоска Ристоски на флејта, Андријана Дукоска на виолончело и Марија Шамоска Буџаковски на пијано создадоа богата камерна атмосфера, исполнета со префинет звук и различни музички изрази. Публиката со внимание го следеше концертот и уживаше во музиката на Astor Piazzolla, Carl Maria von Weber, Трајко Прокопиев, Philippe Gaubert, P. I. Tchaikovsky и Nelio Milotti.
На програмата беа „„Libertango“ и „Oblivion“ од Astor Piazzolla, „Trio in G minor, Op. 63“ од Weber, „Дојранка“ од Трајко Прокопиев, „Trois Aquarelles“ од Philippe Gaubert, избор од „The Seasons, Op. 37“ од P. I. Tchaikovsky и „Охридски бисери“ од Nelio Milotti.
Успешниот концерт уште еднаш покажа дека во Прилеп постои публика која знае да ја препознае и ужива во класичната музика, но и дека камерните состави со квалитетна работа можат да создаваат континуитет и да траат со години. „Trio Dolce“ е формирано во 2016 година, а зад себе има бројни концерти во земјата и странство, како и значајни меѓународни награди.
Концертот во Прилеп беше уште една потврда дека класичната музика има свое место во културниот живот на градот, а ваквите настапи се можност тоа место дополнително да се збогатува со квалитетни музички содржини.
Публиката со заслужен аплауз им се заблагодари на трите уметнички за прекрасната музичка вечер.
