NO FUN BAND СО РОК-МУЗИКА НА КАМЕНАТА БИНА

Камената бина на плоштадот „Александрија“ во Прилеп и овој четврток беше место за рок-музика. Во рамките на манифестацијата „Од 0 до КултурА“, пред прилепската публика настапи охридскиот NO FUN BAND.
Тројцата музичари од охридскиот NO FUN BAND, состав кој веќе две децении ја гради својата музичка приказна – Христијан Бујароски на гитара и вокал, Ристе Гашоски на тапани и вокал и Дарко Бујароски на бас-гитара и вокал – понудија концерт со посебен акцент на песните на легендарниот „Пинк Флојд“.
Со својата изведба, членовите на бендот ја задржаа публиката пред Камената бина, која и овој четврток дојде да ужива во музиката и концертната атмосфера на отворено.
Покрај песните од репертоарот на „Пинк Флојд“, во текот на концертот се слушнаа и други рок-музички теми, со што настапот доби поширок музички карактер.
Настапот на NO FUN BAND ја продолжи музичката програма на „Од 0 до КултурА“, која во текот на летото на Камената бина носи различни музички состави и изведувачи пред прилепската публика.
Овојпат, рок-музиката на охридскиот бенд и песните на „Пинк Флојд“ беа изборот за уште една летна концертна вечер во Прилеп.