На 24 јули (петок) 2026 година, со почеток во 19 часот, на платото пред НУЦК „Марко Цепенков“ во Прилеп ќе се одржи концертот на староградска музика „Звуците на градот“.
Настанот е посветен на негувањето и афирмацијата на македонската староградска музичка традиција, а пред прилепската публика ќе настапат Пејачката група „Орхидеја“, КУД „Преродба – 24“, Здружение на пензионери – Крушево, Октет „Прилеп“, КУД „Пензионер“ – Прилеп и КУД „Пере Тошев“.
Преку внимателно избрана програма, учесниците ќе ги изведат најпознатите староградски песни и музички бисери кои со децении се дел од македонското културно наследство. Концертот има за цел да ја доближи традиционалната музика до пошироката публика и да придонесе кон зачувување на автентичните музички вредности.
Вечерта на староградска музика „Звуците на градот“ годинава се организира по четврти пат од страна на НУЦК „Марко Цепенков“ – Прилеп, со поддршка од Министерството за култура и туризам.
Љубителите на староградската музика ќе имаат можност да уживаат во двочасовна музичка програма исполнета со препознатливи мелодии, емоции и песни што со генерации се дел од урбаниот музички фолклор на Македонија.
