По повод 27-годишнината од постоењето и годишниот концерт што ќе се одржи на 29 април, на Меѓународниот ден на танцот, разговараме со основачот и кореограф на Танцовото студио „Зодијак“ Кире Миладиноски за нивниот уметнички развој, значењето на танцот како универзален јазик и предизвиците во создавањето нови генерации танчери. Во пресрет на јубилејот, тoj открива што ја прави оваа година посебна и што може да очекува публиката од претстојниот концерт. Концертот ќе се одржи на 29 април во големата сала на Центарот за култура „Марко Цепенков“ во Прилеп со почеток во 20:00 часот. Влезот за концертот е бесплатен, но претходно од билетарата на Центарот за култура ќе треба да се подигнат влезници бидејќи бројот на седишта е ограничен.
По повод 27-годишнината на Танц студио „Зодијак“ и претстојниот годишен коцерт закажан за 29 ти април, како се менуваше вашата уметничка визија низ годините и што остана како ваш заштитен белег?
Во текот на овие 27 години, уметничката визија на „Зодијак“ природно еволуираше, следејќи ги современите танцови текови и потребата за постојано истражување на нови изразни форми. Од почетоците до денес, се стремиме кон поголема сценска зрелост, концептуалност и автентичност во секоја продукција. Она што остана непроменето е нашиот заштитен белег – посветеноста кон квалитетот, дисциплината и искрената емоција во движењето, како и создавањето на препознатлив сценски идентитет.
Годишниот концерт се одржува во чест и на Меѓународниот ден на танцот – 29 април. Каква порака сакате да испратите до публиката преку овогодинешната програма?
Овогодинешната програма носи порака за силата на танцот како универзален јазик кој обединува, инспирира и комуницира без граници. Преку различни кореографски изрази, сакаме да потсетиме дека танцот не е само уметност, туку и начин на живеење, средство за личен раст и канал за пренесување емоции и идеи. Во време кога светот брзо се менува, танцот останува искрен и чист облик на човечка комуникација. Ќе бидат прочитани меѓународната порака напишана од Кристал Пајт кореограф и изведувач од Канада, како и домашната порака од Зоица Пуровска Велевска – балерина првенец и истакнат солист во балетот при МНТ.
Што ја прави оваа година и овој концерт посебен во однос на претходните изданија – дали публиката може да очекува нешто ново и изненадувачко?
Оваа година е особено значајна поради самиот јубилеј 27 години постоење, но и поради креативниот пристап што го вложивме во програмата. Публиката ќе има можност да види спој на традиција и современ израз, со нови кореографии, визуелни елементи и сценски решенија кои ја надоградуваат досегашната работа. Подготвивме и неколку изненадувања кои ќе внесат свежина и ќе го направат концертот вистинско сценско доживување за паметење. За првпат покрај режијата, концептот и моите кореографии, освен како изведувачи, поставени се и неколку кореографии на младите Бисера Гаралоска и Марта Шаркоскa, кои во последниот период се движечката креативна сила на самото студио.
Колку е важно континуитетот и посветеноста во градењето млади танчери, и каква улога има „Зодијак“ во развојот на танцовата сцена кај нас?
Континуитетот и посветеноста се клучни во развојот на секој млад танчер. Танцот бара дисциплина, трпение и долгорочна работа, а токму тие вредности се темелот на нашето студио. „Зодијак“ има значајна улога во едукацијата на идна публика за сценски изведбени уметности, но исто така и во создавањето генерации танчери кои не само што настапуваат, туку и ја разбираат уметноста на подлабоко ниво. Горди сме што сме дел од развојот на танцовата сцена кај нас и што придонесуваме кон нејзиното унапредување.
Кои се вашите идни планови по овој значаен јубилеј – дали се подготвуваат нови проекти, соработки или меѓународни настапи?
По овој јубилеј, продолжуваме со уште поголем ентузијазам и амбиција. Во план се нови продукциски проекти, проширување на соработките со домашни и странски уметници, како и учество на меѓународни фестивали. Нашата цел е да го задржиме континуитетот на квалитет и да создадеме нови можности за нашите танчери, притоа претставувајќи ја нашата уметност и надвор од границите на државата.
Фотографии се од албумот на танц студиото „Зодијак“
