Црковниот хор „Св. Петка“ од Прилеп е формиран во 2015 година од протопсалтот м-р Гоце Секулоски, за потребите на новоизградениот храм „Света преподобна маченица Параскева – Петка“. Неговата примарна цел е активно учество во парохискиот богослужбен живот и духовната дејност на храмот, но и давање придонес во развојот на литургиската музика во Македонската православна црква.
Покрај редовното учество во молитвено-литургискиот живот, хорот, заедно со својот скратен состав – ансамблот „Пелагонитиса“, организирал и хуманитарни концерти, како и настапи на бројни културни манифестации низ државата. Меѓу позначајните се издвојуваат: „Прилепско културно лето“, „Денови на Крал Марко“, фестивалот за црковно пеење „Св. Нектариј Битолски“, Хорскиот фестивал „ТЕХО“ во Тетово, како и учеството на јубилејот „95 години Богословски факултет“ во Софија, каде хорот бил дел и од научна конференција посветена на делото на Методиј Кусев.
Во областа на издавачката дејност, со поддршка од Општина Прилеп, хорот го реализира мултимедијалното ДВД издание „Крстот и достоинството македонско – десет прилепски цркви и манастири“, давајќи значаен придонес кон промоцијата на духовниот и манастирски туризам во градот.
Во својата програма, хорот негува богат репертоар кој опфаќа дела од различни периоди и традиции – од рана црковна музика (Палестрина, Бирд), до руски, српски, украински, бугарски и македонски композитори, меѓу кои: Архангелски, Христов, Мокрањац, Бабев, Македонски, Славковиќ и Секулоски.
Станува збор за мешан хор кој изведува православна духовна музика, а во моментов брои 18 членови (6 сопрани, 5 алти, 4 тенори и 3 баси).
Со хорот од неговото формирање раководи м-р Гоце Секулоски, протопсалт (главен црковен пејач), диригент и автор на бројни аранжмани и мелографии на духовни композиции, кој има клучна улога во неговиот уметнички развој.
Особено значаен момент во историјата на ансамблот е нивниот меѓународен концерт во капелата „Саинт Винцент де Паул“ во Париз, Франција, реализиран по повод јубилејот – 10 години постоење. На овој престижен настап, заедно со вокалниот клирос „Пелагонитиса“, хорот достојно ја претстави македонската православна духовна традиција пред меѓународна публика.
Овој концерт има и силна културно-дипломатска димензија, бидејќи преку музиката се промовира духовното и културното наследство на Македонија. За хорот „Св. Петка“, тој претставува важна пресвртница – потврда за неговиот раст од локален црковен ансамбл во препознатлив амбасадор на македонската духовна музика.
Денес, по една деценија постоење, Црковниот хор „Св. Петка“ останува значаен носител на духовната музичка традиција во Прилеп, активно придонесувајќи не само во литургискиот, туку и во културниот и хуманитарниот живот на заедницата.
Хорот е достапен и за приватни свечености, нудејќи посебно музичко доживување за значајни животни моменти. Вашата венчавка и црковна церемонија збогатете ја со гласовите и духовната убавина на овој ансамбл. Со љубов и посветеност, хористите ќе ја направат вашата свеченост уште повеличествена и незаборавна. За да стапите во контакт со хорот и резервирате термин комуницирајте на овој телефон 071 612 114.
Линик до видео на хорот
Фотографиите и видеото се од албумот на хорот „Св. Петка“
