Во пријатна и интимна атмосфера, синоќа фоајето на НУ Центар за култура „Марко Цепенков“ – Прилеп беше исполнето со звуците на француската класична музика. Концертот „Вечер на француски песни“, во изведба на сопранот Билјана Бајевска и пијанистката Јанинка Невчева, на присутната публика ѝ приреди вечер исполнета со префинета музика, поезија и емоција.
Двете истакнати македонски уметници, преку внимателно избраната програма, ја поведоа публиката на музички времеплов низ француската култура од XИX и XX век. Концертот донесе дела од најзначајните француски композитори – Клод Дебиси, Морис Равел, Габриел Форе, Жил Масне и Лео Делиб, чија музика претставува врв на францускиот романтизам и импресионизам.
За разлика од оперската сцена, каде музиката е дел од драмското дејствие, камерната музика за глас и пијано создава интимен простор во кој стихот и мелодијата се спојуваат во едно. Токму таква беше и оваа концертна вечер, инспирирана од поезијата на Пол Верлен, Стефан Маларме, Пол Бурже и Клеман Маро, чии стихови оживеаја низ безвременските композиции на Дебиси и Равел. Во вториот дел од програмата беа изведени и дела од Форе, Масне и Делиб, кои ја доловија префинетата атмосфера на париските музички салони од XИX век.
Публиката имаше можност да ужива во следната програма:
Прв дел:
Fêtes Galantes – Claude Debussy
1.En sourdine
2.Fantoches
3.Clair de lune
Romance ÷ Les Cloches – Claude Debussy
Manteau de Fleurs – Maurice Ravel
Deux épigrammes de Clément Marot – Maurice Ravel
Втор дел:
1.D’Anne qui me jecta de la neige
2.D’Anne jouant de l’espinette
Noël des enfants qui n’ont plus de maisons – Claude Debussy
Apparition – Claude Debussy
Aimons – nous et Dormons – Claude Debussy
Beau soir – Claude Debussy
Après un rêve – Gabriel Fauré
Ouvre tes yeux bleus… – Jules Massenet
Chant de l’almée – Léo Delibes.
Со својата музикалност, сценска зрелост и одлична меѓусебна комуникација, Билјана Бајевска и Јанинка Невчева приредија концерт кој уште еднаш ја потврди убавината на камерната музика и француската музичка традиција. Настанот беше реализиран во организација на НУ Центар за култура „Марко Цепенков“ – Прилеп со поддршка на Министерството за култура и туризам и претставуваше уште една квалитетна музичка вечер во културната понуда на Прилеп.
