Фоајето на НУЦК „Марко Цепенков“ синоќа беше исполнето со љубители на класичната музика кои уживаа во концертот „Спомени од минатиот век“, во изведба на камерното дуо Михаил Јагуриноски и Искра Атанасова – Митуш.
Младите пијанисти, кои настапуваат како камерно дуо од 2025 година и се усовршуваат во класата на проф. д-р Нина Костова на Факултетот за музичка уметност во Скопје, приредија музичка вечер што ја воодушеви прилепската публика. Од самиот почеток беше забележлива нивната одлична меѓусебна комуникација и уметничка усогласеност – кога едниот ја водеше музичката мисла, другиот со исклучителна прецизност и чувство ја надополнуваше, создавајќи хармонична и впечатлива целина.
Публиката имаше можност да ужива во виртуозните изведби на делата од циклусот „6 Morceaux“, опус 11 од Сергеј Рахмањинов – Barcarolle, Scherzo, Theme Russe, Waltz, Romance и Slava, како и во едно од најпознатите дела на Џорџ Гершвин – „Rhapsody in Blue“. Ваквата програмска комбинација претстави две различни музички естетики кои оставиле длабока трага во музиката на 20 век – романтичната експресивност на Рахмањинов и препознатливиот спој на класичната музика и џезот кај Гершвин.
Во текот на концертот беше очигледно колку двајцата уметници уживаат во музицирањето. Нивната посветеност, емоционална интерпретација и сигурна техника лесно се пренесоа и на присутните, кои со големо внимание ги следеа сите композиции, а секоја изведба ја наградуваа со долг и искрен аплауз.
Концертот уште еднаш потврди дека младите македонски музичари успешно ја продолжуваат традицијата на врвната музичка интерпретација.. Со својот талент, зрелост и одлична сценска комуникација, Михаил Јагуриноски и Искра Атанасова – Митуш приредија вечер која долго ќе остане во сеќавањето на прилепската публика.
