„ПРИКАЗНИ ОД БАЛКАНОТ“: МЕЃУНАРОДНИОТ ФЕСТИВАЛ НА КРАТОК ФИЛМ – АЛЕКСАНДРИЈА ПРИСТИГНУВА ВО БИТОЛА

Публиката во Битола вечерва и утре ќе има можност да проследи десет кратки филмови во рамки на патувачката програма „Приказни од Балканот – на пат“ на Меѓународниот фестивал на краток филм – Александрија (IASFF) од Грција.
Филмските проекции ќе се одржат во Малата сала на НУ Центар за култура – Битола, вечерва, 10 септември, со почеток во 19:30 часот, и утре, 11 септември, од 18:00 часот.
Програмата носи десет внимателно селектирани кратки филмови од 11. издание на фестивалот, кое годинава се одржува под темата „Приказни од Балканот“ и посебно внимание им посветува на новите филмски гласови од регионот, истовремено отворајќи простор и за различни меѓународни перспективи и филмски изрази.
На програмата се кратки филмови од различни земји и автори, меѓу кои остварувања од Шпанија, Молдавија, Турција, Грција, Македонија, Иран, Унгарија, Колумбија, Романија, Белгија и Франција. Низ различни културни средини и авторски визии, филмовите отвораат теми и приказни за човечките односи, личните избори, секојдневието и современите општествени предизвици.
Меѓународниот фестивал на краток филм – Александрија (IASFF) е основан во 2015 година во Александрија, Северна Грција, како платформа за филмско раскажување и дијалог што ги надминува границите. Фестивалот ги поврзува филмаџиите и публиката, а своето културно влијание го развива и преку филмски проекции, стручни работилници, специјални настани и соработки со академската и професионалната филмска заедница.
Во својата работа фестивалот го нагласува и значењето на киното како простор за дијалог, културна размена и заеднички искуства кои ги надминуваат јазикот и географијата.
Од 2018 година IASFF го организира Александрискиот филмски и културен клуб „KINIMATODRASIS“, кој преку филмски проекции, театарски претстави, работилници, едукативни активности и уметнички собири создава простор за креативност, културно изразување и поврзување на луѓето, идеите и авторите.
Со гостувањето на патувачката програма „Приказни од Балканот – на пат“, љубителите на краткиот филм ќе имаат можност во Битола да проследат различни филмски приказни, авторски пристапи и перспективи обединети преку јазикот на кинематографијата.