„МУЗИЧКИ КОД“ – КОНЦЕРТ НА МАКЕДОНСКАТА ФИЛХАРМОНИЈА ВО БИТОЛА

Македонската филхармонија на 14 октомври 2026 година ќе одржи концерт во Големата сала на Центарот за култура Битола, насловен „Музички код“. Концертот ќе започне во 19:30 часот, а со оркестарот ќе диригира Борјан Цанев.
Програмата е посветена на увертирата и нејзиниот развој низ различни композиторски пристапи, претставени преку дела на Волфганг Амадеус Моцарт, Џоакино Росини, Лудвиг ван Бетовен, Јоханес Брамс, Рихард Вагнер, Џузепе Верди и Дмитриј Шостакович.
Од оперските увертири на Моцарт и Росини, преку драматуршката и симфониската изразност на Бетовен и Брамс, до музичките светови на Вагнер и Верди и концертниот пристап на Шостакович, програмата нуди музички пресек низ различни периоди и стилови. Во неа увертирата се претставува не само како вовед во сценско дело, туку и како музичка форма што низ времето добивала различни изразни можности.
Со концертот ќе диригира Борјан Цанев, еден од истакнатите македонски диригенти, чија професионална кариера опфаќа соработки со оркестри во Европа, САД и Азија. Меѓу неговите гостувања се настапите со Лондонскиот симфониски оркестар, Софиската филхармонија, Филхармонијата во Краков и Северночешката филхармонија.