КОМЕДИЈАТА „ЕВРОПА ИЛИ СМРТ“ НА 8 АВГУСТ ВО БИТОЛА

Во рамките на програмата на БИТФЕСТ – Битолско културно лето 2026, на 8 август (сабота), со почеток во 20 часот, во Центарот за култура – Битола ќе биде изведена театарската комедија „Европа или смрт“.
Станува збор за современа комедија која низ хумор, сатира и препознатливи животни ситуации ги отвора прашањата за современото општество, балканскиот менталитет, личните и колективните предизвици, како и потрагата по подобар живот.
Претставата на духовит начин ги обработува секојдневните апсурди, нудејќи ѝ на публиката и смеа и можност за препознавање во ликовите и ситуациите што се прикажани на сцената.
Автор на текстот е Мирољуб Недовиќ, а во претставата настапуваат Никола Тргачевски – Кумба, Елена Наумовски Трпковска и Душан Кузевски. Со оваа изведба актерите повторно ќе настапат пред битолската публика.
Според најавата на организаторите, претставата со својата динамична изведба и актуелна тематика нуди вечер исполнета со хумор, но и повод за размислување за реалноста во која живееме.
Комедијата е дел од овогодишната програма на БИТФЕСТ – Битолско културно лето 2026.