„ГРАДОТ ВО МЕНЕ“ – НОВ ЦИКЛУС ДЕЛА НА АЛЕКСАНДАР ЏИНГО ВО ПРИЛЕП

Во Ликовната галерија на НУЦК „Марко Цепенков“ во Прилеп на 25 септември (петок), со почеток во 19 часот, ќе биде отворена изложбата „Градот во мене“, со дела од академскиот уметник м-р Александар Џинго. Изложбата ќе биде поставена до 7 октомври.
„Градот во мене“ е најнов циклус на Џинго, во кој авторот се движи меѓу препознатливата фигуративност и современиот апстрактен израз. Човечката фигура и портретот се појавуваат во процес на разложување и повторно создавање, отворајќи простор за истражување на внатрешниот свет, емоциите и личното доживување на реалноста.
Делата се реализирани во голем формат, со комбинација на цртачка техника со јаглен и сликарски пристап преку маслени бои, мрсен пастел и акрил. Колоритот се движи од монохроматски до полихроматски решенија, со слободен и експресивен потег.
Во текстот за изложбата, Бранче Трајкоски посочува дека циклусот создава спој меѓу класичната уметност и современиот експресионистички израз, при што деконструираните ликови стануваат начин за истражување на човечката душа.
Со „Градот во мене“, Џинго продолжува да го истражува човечкиот лик и фигурата низ личен филозофско-ликовен јазик, оставајќи простор гледачот во делата да препознае и сопствени емоции и асоцијации.