Во Охрид, на 23 мај, во Конгресниот центар се одржа научната конференција „Континуитетот на кирилометодиевската традиција изразен во Охридската книжевна школа“, на која учествуваа и претставници од Институт за старословенска култура.
Конференцијата беше организирана од Институт за македонска литература во соработка со Општина Охрид, во рамките на „Културната рута на Кирил и Методиј“, а обедини истражувачи, професори и научни работници посветени на проучувањето и зачувувањето на кирилометодиевското наследство.
На научниот собир учествуваа истражувачите Илија Велев, Маја Јакимовска-Тошиќ, Александар Василевски, Наташа Аврамовска, Соња Стојменска-Елзесер, Славица Петровска-Ѓорѓевска и Ели Лучевска.
Настанот беше дел од програмата со која во Охрид се одбележаа Деновите на словенските просветители Светите Кирил и Методиј. Во периодот од 21 до 24 мај, градот беше домаќин на повеќе активности посветени на кирилометодиевската традиција и Охридската книжевна школа.
Програмата вклучуваше комеморативна церемонија пред споменикот на Светите браќа Кирил и Методиј, како и свечената академија „Од Словото до вечноста“, што се одржа во Црква Света Софија.
Со ваквите научни собири, Охрид уште еднаш го потврди своето значајно место како духовен и културен центар на словенската писменост и традиција.
Фото: ФБ на Институт за старословенска култура – Прилеп
