БИТ ФЕСТ 2026 ЗАПОЧНУВА НА 19 ЈУНИ СО МЈУЗИКЛОТ „КАО КАКАО“

Со изведбата на мјузиклот „Као какао“, инспириран од музиката на Влатко Стефановски, на 19 јуни свечено ќе биде отворено годинашното издание на фестивалот „Битолско културно лето – БИТ ФЕСТ 2026“.
Отворањето е закажано во НУ Центар за култура – Битола, со почеток во 19:30 часот. Станува збор за љубовна приказна напишана од Венко Андоновски, а режијата ја потпишува Дејан Пројковски.
Мјузиклот „Као какао“ е инспириран од безвременската музика на Влатко Стефановски и претставува еден од најавуваните настани во програмата на овогодишниот БИТ ФЕСТ, кој и ова лето ќе понуди богата културно-уметничка содржина за битолчани и посетителите на градот.
Влезниците по цена од 300 денари се достапни од 15 јуни во Офицерскиот дом во Битола, во термините од 10:00 до 14:00 часот и од 18:00 до 20:00 часот.