РАБОТИЛНИЦА ЗА МОЗАИК ВО ПРИЛЕП: ТРИ ДЕНА КРЕАТИВНО ДРУЖЕЊЕ ВО ЛИКОВНАТА ГАЛЕРИЈА

Љубителите на визуелната уметност и креативното изразување ќе имаат можност да се запознаат со техниките на мозаикот преку тридневна работилница што ќе се одржи од 17 до 19 јуни 2026 година во Ликовната галерија при Националната установа Центар за култура „Марко Цепенков“ – Прилеп.
Работилницата ќе се реализира секој ден во периодот од 08:00 до 14:30 часот, а учесниците ќе имаат можност да ги совладаат основните и напредните принципи на изработка на мозаици, да се запознаат со различни материјали и техники, како и практично да работат на сопствени креативни дела.
Ментор на работилницата е Александра Димитрова, додека координатор на проектот е Марјан Стојановски. Настанот е организиран од Националната установа Центар за култура „Марко Цепенков“ – Прилеп, со поддршка од Министерството за култура и туризам.
Работилницата претставува одлична можност за сите заинтересирани, без разлика на претходното искуство, да навлезат во светот на мозаичната уметност, да ги развијат своите креативни вештини и да создадат уникатни уметнички композиции.
Организаторите информираат дека бројот на места е ограничен, па заинтересираните учесници треба навреме да го обезбедат своето учество.