Со добра посетеност синоќа во Ликовната галерија на НУЦК „Марко Цепенков“ во Прилеп беше отворена изложбата „Линија, форма и простор“ на академскиот уметник Филип Перески.
Пред присутните за изложбата и творештвото на Перески зборуваше Каролина Мицеска, која се осврна на ликовниот пристап на авторот и неговото истражување на линијата, формата и просторот.
Перески во своето творештво продолжува да ги истражува можностите на формата и нејзините односи со просторот. Линијата кај него се појавува како активен и динамичен елемент, преку кој се создаваат различни односи, движења и ритми во композицијата. Во неговите сликарски и скулпторски дела формите се ослободени од строгата геометриска определеност и се претвораат во визуелни структури што оставаат простор за различни асоцијации.
Ова е уште една изложба во која авторот продолжува да се занимава со темите што се препознатливи во неговото досегашно творештво. Перески, кој е роден во Прилеп во 1990 година и живее и работи во градот, зад себе има повеќе самостојни и групни изложби, а „Линија, форма и простор“ е неговата петта самостојна изложба во Прилеп.
Неговото творештво во изминатиот период се развива низ континуирано истражување на линијата и формата, што може да се следи и преку неговите претходни самостојни изложби – „Фактурални завиткувања“, „Линеарно обликување“, „Линеарна Хармонија“ и „Линиски одрази“.
На отворањето Перески говореше и за своето понатамошно творечко продолжение, најавувајќи дека неговата следна изложба е во фаза на подготовка и наскоро би требало да биде претставена во Загреб. Со тоа, неговото истражување на линијата, формата и просторот продолжува да се развива и надвор од прилепската ликовна сцена.
Изложбата „Линија, форма и простор“ во Ликовната галерија на НУЦК „Марко Цепенков“ ќе може да се посети во наредните 14 дена.
