ЈОУ Градска библиотека „Борка Талески“ – Прилеп распиша три конкурси за учениците од основните и средните училишта од Општина Прилеп, за избор на најдобра лична творба, најдобра рецитација и најдобар краснопис. Рокот за пријавување е 9 ноември 2026 година, а доделувањето на наградите за сите три конкурси е предвидено за 25 ноември.
Конкурс за најдобра лична творба – лирска песна
На конкурсот за најдобра лична творба можат да учествуваат ученици од основните и средните училишта. Песните треба да бидат авторски, оригинални и досега необјавени, со тема и мотиви по слободен избор, а нивната должина не треба да надминува 32 стиха.
Творбите се испраќаат во електронска форма од страна на менторите, во Word документ, со кирилична поддршка, фонт Times New Roman, големина 12, и со наведени име и презиме на авторот.
Натпреварувањето е поделено во три категории:
- ученици од III до V одделение;
- ученици од VI до IX одделение;
- ученици од средните училишта.
При оценувањето ќе се земат предвид композицијата на песната, ритамот и римата, поетските слики, содржината, јазичниот израз, стилските средства, автентичноста и оригиналноста.
Од Библиотеката посочуваат дека доколку се забележи користење вештачка интелигенција во испратените творби, тие веднаш ќе бидат дисквалификувани.
Конкурс за најдобра рецитација
На конкурсот за најдобра рецитација можат да учествуваат ученици од основните и средните училишта. Изборот на песна е слободен, а рецитацијата треба да трае најмногу три минути. Песната треба да се рецитира наизуст, без придружни видео и аудио ефекти.
Натпреварот ќе се одржи на 11 ноември 2026 година во просториите на Библиотеката, според следниот распоред:
- од 12 часот – ученици од III до V одделение;
- од 14 часот – ученици од VI до IX одделение;
- од 16 часот – ученици од средните училишта.
Секое училиште може да учествува со најмногу пет ученици во секоја категорија. При оценувањето ќе се земат предвид артикулацијата, дикцијата, логичкиот акцент, интонацијата, паузите, времетраењето, правилната употреба на јазичната норма и емоционалниот израз соодветен на содржината на песната. За движење или сценска изведба, како и за читање на творбата, ќе се одземаат бодови.
Конкурс за најдобар краснопис
Конкурсот за најдобар краснопис е наменет за учениците од III до V одделение од основните училишта во Општина Прилеп. Учесниците треба да пишуваат со ракописно кирилично писмо, при што ќе се оценуваат правилното обликување на буквите, големината на малите букви, интерпункцијата, употребата на големи букви, растојанието меѓу буквите и зборовите, наклонот и ритамот на пишувањето.
Особено внимание ќе се посвети на правилното пишување на ракописните букви, уредноста и прецизноста на текстот, како и на севкупниот впечаток. Треба да се користи пенкало, а секое училиште може да пријави најмногу 15 ученици.
Натпреварот ќе се одржи на 13 ноември 2026 година, во периодот од 11 до 16:30 часот, во просториите на Библиотеката. Училиштата дополнително ќе бидат известени за составот на групите.
Пријавување и доделување награди
За сите три конкурси, пријавувањето се врши на електронската адреса bibliotekaprilep1@gmail.com, најдоцна до 9 ноември 2026 година. За личните творби, во предметот на пораката треба да стои назнаката „За конкурсот за најдобра лична творба“.
Резултатите од сите три конкурси ќе бидат објавени најдоцна до 17 ноември 2026 година.
Доделувањето на наградите ќе се одржи на 25 ноември 2026 година, со почеток во 18 часот, во просториите на Градската библиотека „Борка Талески“ – Прилеп.
Со трите конкурси, Библиотеката им овозможува на учениците да ги покажат своите творечки способности, рецитаторски вештини и писмено изразување, поттикнувајќи ја љубовта кон литературата, поезијата и убавото пишување.
