Во театарот „Војдан Чернодрински“, во тек се подготовките за новата театарска претстава „Саатот“, по текст на Лидија Митоска Ѓорѓиевска, во режија на Кристина Димитрова.
Костимографијата и сценографијата се на Благој Мицевски, додека музиката ја потпишуваат Филип Јездиќ и Томе Темелкоски. Во претставата настапуваат актерите Димитар Ѓеорѓиевски, Наташа Ачански и Филип Јездиќ, кој воедно ја има и улогата на персонифициран ѕиден часовник.
„Саатот“ е интимна трагикомедија со апсурдни и постмодерни драматуршки елементи. На сцената двајца актери ги толкув-аат ликовите на Вера и Јован, додека третиот актер – музичар го игра симболичниот лик на часовникот. Тој го следи текот на приказната и низ своето присуство открива различни аспекти на времето и на современиот живот.
За концептот на претставата, режисерката Кристина Димитрова истакнува дека во фокусот е односот на човекот со времето и различните ритми во кои луѓето го живеат животот.
– „Што е време? Времето е она што часовниците го мерат, рекол еднаш Ајнштајн. Информациите за времето го кажуваат времетраењето на настаните, и кога тие се случуваат, или кои настани се случуваат пред кои други. Времето игра многу значајна улога во структурата на универзумот, вклучувајќи ја и структурата на нашиот личен живот. Сепак, има многу нерешени прашања, и филозофски и научни. Ќе пробаме да навлеземе во таа суштина на времето, преку ритамот на СААТОТ. Дали времето е музиката на животот? Јован е маж на Вера. Како што го опишува писателката Митоска, тој е ведар, опуштен и исполнет човек кој наоѓа задоволство во малите нешта. Вера, од друга страна, ниту може да дејствува и да ја промени својата состојба во општеството што се распаѓа, ниту може да се помири и да најде спокојство во својот мирен, „нормален“ живот. Распаѓањето на општеството го симболизира распаѓањето на животот… Сопругот и сопругата имаат различно психолошко време во себе и во нив се наоѓа различен часовник кој што свири различна музика. Иако Вера живее со партнерот во разбирање и љубов. Но, таа се случува дека ништо не се менува, а кога нема промени, времето не е гледа и чувствува. Вера се чувствува заглавена во секојдневните рутини, секој ден и е ист и гледа како животот и минува без вистински да го живее. Постојано го убедува да заминат и да почнат нов живот, но за Јован тоа е неприфатливо. Саатот го следи секој нејзин чекор и буквално и ги брои секундите, поточно, и ги одбројува. Тој часовник чука во неа. Вера и Јован живеат во различно време, во различно темпо. Нивните души не можат да се пронајдат во нивното субјективно гледање на животот. Оваа пиеса обработува бројни социјални и филозофски теми низ лесен дијалог и едноставно дејство. Започнува во јавето, а завршува некаде меѓу јавето и сонот. Репликите се кратки и напишани на едноставен, разговорен јазик. Ќе се почувствува осаменоста, времето, двете души во времето и ќе пробаме да го слушнеме нивниот ритам. Секако и темата распад на душата и распад на општеството ќе игра клучна улога во концептот и идејата на самата претстава“ – вели режисерот Критина Димитрова.
Претставата „Саатот“ е дел од годишната програма за работа на театарот „Војдан Чернодрински“ за 2026 година, поддржана од Министерството за култура и туризам. Премиерата е најавена за почетокот на април.
