55 ГОДИНИ ОД „ЗЛАТНАТА АРЕНА“ – ОМАЖ ЗА ДАРКО ДАМЕСКИ ВО ПРИЛЕП

Во кино салата „Мис Стон“ во Прилеп, на 28 мај 2026 година (четврток), со почеток во 19 часот, ќе се одржи настан посветен на ликот и делото на Дарко Дамески, по повод 55 години од добивањето на престижната награда „Златна арена“.
Според програмата, пристигнувањето на гостите е предвидено за во 19:00 часот, а официјалниот дел ќе започне во 19:30 часот со обраќање на претседателот на Ротари клубот, Орде Ѓорѓиоски. Пред присутните ќе се обратат и раководителот на НТП „Војдан Чернодрински“, Михајло Миленкоски, како и Симеон Мони Дамески, син на Дарко Дамески.
Во рамки на настанот ќе биде отворена изложба, а ќе биде прикажан и омаж за Дарко Дамески, изработен од Горан Марковски. Предвидена е и проекција на филмот „Црно семе“, за чија улога Дарко Дамески ја добил наградата „Златна арена“ на фестивалот во Пула.
Настанот е поддржан од Ротари клубот од Прилеп. Идејата и иницијативата за изложбата се на Саша Шотаровски, додека плакатот и поканите ги изработи неговата внука Бојана Чаминска Тиноко.